Rigveda 9.42

ऋग्वेद 9.42

VedicUniversal

Sanskrit Text

६ मेध्यातिथि: काण्व: । पवमान: सोम: । गायत्री । ज॒नय॑न्रोच॒ना दि॒वो ज॒नय॑न्न॒प्सु सूर्य॑म् । वसा॑नो॒ गा अ॒पो हरि॑: ॥१॥ ए॒ष प्र॒त्नेन॒ मन्म॑ना दे॒वो दे॒वेभ्य॒स्परि॑ । धार॑या पवते सु॒तः ॥२॥ वा॒वृ॒धा॒नाय॒ तूर्व॑ये॒ पव॑न्ते॒ वाज॑सातये । सोमा॑: स॒हस्र॑पाजसः ॥३॥ दु॒हा॒नः प्र॒त्नमित्पय॑: प॒वित्रे॒ परि॑ षिच्यते । क्रन्द॑न्दे॒वाँ अ॑जीजनत् ॥४॥ अ॒भि विश्वा॑नि॒ वार्या॒भि दे॒वाँ ऋ॑ता॒वृध॑: । सोम॑: पुना॒नो अ॑र्षति ॥५॥ गोम॑न्नः सोम वी॒रव॒दश्वा॑व॒द्वाज॑वत्सु॒तः । पव॑स्व बृह॒तीरिष॑: ॥६॥

Transliteration

6 medhyātithi: kāṇva: | pavamāna: soma: | gāyatrī | ja॒naya̭nroca॒nā di॒vo ja॒naya̭nna॒psu sūrya̭m | vasā̭no॒ gā a॒po hari̭: ||1|| e॒ṣa pra॒tnena॒ manma̭nā de॒vo de॒vebhya॒spari̭ | dhāra̭yā pavate su॒taḥ ||2|| vā॒vṛ॒dhā॒nāya॒ tūrva̭ye॒ pava̭nte॒ vāja̭sātaye | somā̭: sa॒hasra̭pājasaḥ ||3|| du॒hā॒naḥ pra॒tnamitpaya̭: pa॒vitre॒ pari̭ ṣicyate | kranda̭nde॒vā~ a̭jījanat ||4|| a॒bhi viśvā̭ni॒ vāryā॒bhi de॒vā~ ṛ̭tā॒vṛdha̭: | soma̭: punā॒no a̭rṣati ||5|| goma̭nnaḥ soma vī॒rava॒daśvā̭va॒dvāja̭vatsu॒taḥ | pava̭sva bṛha॒tīriṣa̭: ||6||