Rigveda 9.37

ऋग्वेद 9.37

VedicUniversal

Sanskrit Text

६ रहूगण आङ्गिरस: । पवमान: सोम: । गायत्री । स सु॒तः पी॒तये॒ वृषा॒ सोम॑: प॒वित्रे॑ अर्षति । वि॒घ्नन्रक्षां॑सि देव॒युः ॥१॥ स प॒वित्रे॑ विचक्ष॒णो हरि॑रर्षति धर्ण॒सिः । अ॒भि योनिं॒ कनि॑क्रदत् ॥२॥ स वा॒जी रो॑च॒ना दि॒वः पव॑मानो॒ वि धा॑वति । र॒क्षो॒हा वार॑म॒व्यय॑म् ॥३॥ स त्रि॒तस्याधि॒ सान॑वि॒ पव॑मानो अरोचयत् । जा॒मिभि॒: सूर्यं॑ स॒ह ॥४॥ स वृ॑त्र॒हा वृषा॑ सु॒तो व॑रिवो॒विददा॑भ्यः । सोमो॒ वाज॑मिवासरत् ॥५॥ स दे॒वः क॒विने॑षि॒तो॒३ऽभि द्रोणा॑नि धावति । इन्दु॒रिन्द्रा॑य मं॒हना॑ ॥६॥

Transliteration

6 rahūgaṇa āṅgirasa: | pavamāna: soma: | gāyatrī | sa su॒taḥ pī॒taye॒ vṛṣā॒ soma̭: pa॒vitrḙ arṣati | vi॒ghnanrakṣāṃ̭si deva॒yuḥ ||1|| sa pa॒vitrḙ vicakṣa॒ṇo hari̭rarṣati dharṇa॒siḥ | a॒bhi yoniṃ॒ kani̭kradat ||2|| sa vā॒jī ro̭ca॒nā di॒vaḥ pava̭māno॒ vi dhā̭vati | ra॒kṣo॒hā vāra̭ma॒vyaya̭m ||3|| sa tri॒tasyādhi॒ sāna̭vi॒ pava̭māno arocayat | jā॒mibhi॒: sūryaṃ̭ sa॒ha ||4|| sa vṛ̭tra॒hā vṛṣā̭ su॒to va̭rivo॒vidadā̭bhyaḥ | somo॒ vāja̭mivāsarat ||5|| sa de॒vaḥ ka॒vinḙṣi॒to॒3'bhi droṇā̭ni dhāvati | indu॒rindrā̭ya maṃ॒hanā̭ ||6||